mohamed belkhayati وين أيام زمان يا لصنام

وين أيام زمان يا لصنام

وين أيام زمان يا لصنـــــــــــام .................. نتفكرو فيك واش فوتنا
الشي الي جوزناه عوض منام .............. مثل الخيال باقي امقابلنا
راح الصغر او راحت الايــــــــام............... اجرا مورانا الكبر والحقنا 

اضحينا منسيين في لفام ............ مثل ما نساوك يا مدينتنا
همك او همي اتقول توام ................ في مدة قصيرة تنسينا
اتفكرتك وهديتلك انـــظام ................ يفهمهم من يفسر المعنا

يعرف كيفاش كانت الاصنام ............... البلاد الي فيها تربينا
البلاد الي فيها ارفعت أعلام................أو مازلت مع الدهر سمعتنا

أغتب فينا شحال من نمّام.............. بالكذب بلا ما يعاشـــــرنا
الأصنام أو قالو الإسم حرام............... سماوك على واد داهمنا
كلش امشا او فاتت الاعوام .............. رحنا معاها بعيد ورجعــنا

كنّا غير زايدين للقدام ............ لكن للأيـــــــــام خططنا
بهدو ء او راحة وانتظام .............. والغالط مسكين جاهلنا
عشنا وزهينا مع الايام ..................... ودرنا فيها واش حبينا

وعلى ذا الشي شاهدا لرسام........ في كل مرسم واش عقبنا
بكيّنا أو بكاونا لريـــــــــــــــــام............ شفنا وقرينا أو جربنا
كانت بكري مسقما تســـــقام ......... الشي الي نطلبوه يوصلنا

غنينا على الحمام والحمّام ............. أو بكيّنا من كان عاشقنا
كنّا أنسالو النص في لسهام............ وأرجعنا أنشوفو بعينينا
بعد كل ذاك الصحو عاد اغيام........... يا ريت لوكان غير ما شفنا

النهار امشا والليل جا بظلام ............ البحر أهلك والموج طيشّنا
بقينا بين الصح والأحـــــلام............. كلي ما شفنا أو ما رينا
مثلت روحي ليك يا لـــصنام............. أتبدلتي كيما تبدلنا
بلخياطي جابو ذو لنظـــــام ............. التاريخ يبقا شاهد اعلينا

تمت هذه القصيدة في يوم 1996/08/13
من كلمات الأديب المنسي محمد بلخياطي